المساعد الشخصي الرقمي

مشاهدة النسخة كاملة : أمثال شعبية (تبي ليبي صح)



طارق المصراتي
14-07-2008, 10:45 AM
بسم الله الرحمن الرحيم
السلام عليكم ورحمة الله وبركاته

هذا الموضوع نبي فيه كل واحد منكم يحط مثل شعبي من التراث الليبي وكان يعرف المناسبة اللي تنقال فيه يشرحها لينا بطريقته الخاصة ، لأن الكثير منا يجهل الأمثال الشعبية وفي اللي يعرفها وما يعرفش معناها أو المناسبة اللي تنقال فيها .

وأني أول من يبدأ ، وننتظر تجاوبكم معانا .

طارق المصراتي
14-07-2008, 10:54 AM
عنوان المثل:

يسأل على البسباس ومن زرعه !!!

المعنى من المثل والمناسبة اللي تنقال فيه:

هذا المثل ينقال للشخص اللي أسئلته واستفساراته كثيره ، ومش هكي وبس هذه الأسئلة مش لأمور نافعه أو ليها فائدة زي ما تقول شخص يتعلم ، لكن الأسئلة الغرض منها التعرف على كل كبيرة وصغيرة في أمور الناس ومشاكلهم وأعمالهم وأفراحهم وأحزانهم من الأخير (قصقااااااااااص) .

طارق المصراتي
14-07-2008, 11:13 AM
عنوان المثل:

المزود الرقيق ؛؛؛ ما يحمل من الدقيق !!!

المعنى من المثل والمناسبة اللي تنقال فيه:

هذا المثل ينقال للشخص الضعيف الرقيق بالفلاقي زي التل ، لكن لما يقعمز ياكل قريب ياكلك حتى إنت ، لين الواحد يقول سبحان الله اللي ياكل فيه وين يمشي ، ولما تقارنه بشخص سمين في الماكله ما يجي زيه شي ....

مريم
14-07-2008, 03:55 PM
قطوس صافي و لا جمل شركة


مثل فيه تحذير ضمني من الشركة في اي شيء مهما كانت عظمته
و الانسان لو يملك قطة خاصة بيه على سبيل المثال خير من جمل شركة هو و حد تاني

على فكرة انا المثل هذا عندي مبدأ ، يعني مقتنعة بيه عالاخر

و زي ما يقولوا اجدادنا

الشركة تركة و الجرب يعدي

طارق المصراتي
15-07-2008, 09:21 AM
عنوان المثل:

خانها ذراعها ؛؛؛ قالت أني مسحوره !!!

المعنى من المثل والمناسبة اللي تنقال فيه:

هذا المثل ينقال في المراة التنبالة اللي كان تلقى لا تضم ولا تطيب ، وين تحصل في أمر معين وإلا تدير حاجة ما تقدرش تنجزها وتبدا تتسبل بسبل ما فيش منها ، يعني ما عندهاش القدرة إنها تكمل اللي بدت فيه ، مثلاً تقولك مريضة وإلا ماكينة الرشدة ما تنفعش وإلا الكوشا ما تخدمش باهي ..........الخ .

مريم
15-07-2008, 11:34 AM
اقلب الطنجرة على فمها

تطلع البنت لأمها

فيه دلالة عظيمة ان البنت مهما كانت شخصيتها فيها فيها من امها و طبع امها و ملامح امها

طارق المصراتي
15-07-2008, 01:34 PM
عنوان المثل:

دوام الحال ؛؛؛ من المُحال !!!

المعنى من المثل والمناسبة اللي تنقال فيه :

هذا المثل يضرب للشخص اللي حالته كويسه يعني أموره المادية مليحة وبعد كل هالعز يفقد أمواله وثروته ويصبح كأن لم يكن ، يعني من الصعب على الإنسان إنه يحافظ على مستوى معين من الحياة ، وهذا المثل ينطبق كذلك على الأمور المعنوية والأمر هذا على الشخص السعيد وتنقلب حياته لتعاسة وحزن بسبب هموم الدنيا أجارنا الله منها وأياكم .

الديب
15-07-2008, 02:11 PM
يا شارب الابن مرجوعك للماء[
COLOR="Gray"][/COLOR]

الديب
15-07-2008, 02:13 PM
يا شارب الابن مرجوعك للماء
عندي عين ما كفت نحيب وعندي نفس مليانه هموم
زهاها غاب مطرها عطيب لها مدة ما تعرف النوم
وعندي فكر في ماضي إيجيب إيحوس سماه يملنه أغيـوم
أنسيت الود ما نبي حبيب أنا والياس مولودين توم
وفي الافراح ما عندي نصيب رفيقي ليل وأصحابي نجوم

الديب
15-07-2008, 02:13 PM
يا شارب الابن مرجوعك للماء
عندي عين ما كفت نحيب وعندي نفس مليانه هموم
زهاها غاب مطرها عطيب لها مدة ما تعرف النوم
وعندي فكر في ماضي إيجيب إيحوس سماه يملنه أغيـوم
أنسيت الود ما نبي حبيب أنا والياس مولودين توم
وفي الافراح ما عندي نصيب رفيقي ليل وأصحابي نجوم

طارق المصراتي
16-07-2008, 12:13 PM
عنوان المثل:

الباهي باهي ؛؛؛ من يومه !!!

المعنى من المثل والمناسبة اللي تنقال فيه :

هذا المثل ينقال على الشخص اللي أصله طيب ومهما صار مايتبدلش طبعه ، والأمر ينطبق على الشخص الراقي في تصرفاته مع الناس يعاملهم بلطف يساعدهم يعني من الأخير مش مقصر مع حد .

طارق المصراتي
16-07-2008, 12:23 PM
عنوان المثل:

بعد ما شاب ؛؛؛ خش الكتّاب !!!

المعنى من المثل والمناسبة اللي تنقال فيه:

هذا المثل ينقال على الشخص الكبير في السن يعني شيباني يمكن تجاوز الخمسين من عمره ، وهذا الشخص يبي يخوض في أمور ويتعلمها من المفروض إنه تعلمها لما هو شاب ، والكتّاب هو مركز تحفيظ القرآن الكريم كما نقول (الخلوة) ، والكتّاب مأخوذة من تكتيب لمّا الشيخ يمل على الطالب اللي يكتب على اللوح .
المختصر مفيد إن الشخص لازم ما يستفيد من وقته وشبابه في فعل ما يجب فعله وما يقولش بعدين بعدين لين يفوت الفوت ، وهذا يقابله المثل باللغة العربية ( لا تؤجل عمل اليوم إلى الغد ) .

مريم
16-07-2008, 09:35 PM
الفرق بين الباهية و الشينة كما الفرق بين الورد و العفينة

(( يعني ان في فرق بين الافعال الحسنة و الاشياء الحسنة و الافعال و الاشياء السيئة
و الفرق واضح كما الفرق بين الورد طيب الرائحة و بين الاعشاب ذات الرائحة الكريهة ))

طارق المصراتي
17-07-2008, 09:08 AM
عنوان المثل:

اللي يبّي الورد ؛؛؛ يتحمّل شوكه !!!

المعنى من المثل والمناسبة اللي تنقال فيه:

من المعروف إن الورد جميل ويحب كل شخص منّا يمسك وردة ويشمها لكنه سيدفع الثمن ربما بتعرّضه لوخز شوكة من هذه الوردة .
يعني إن الشخص لما يحب شخص آخر سواء صداقة أو حب لازم يتحمل زلاته ولا زم يتحمل عفايسه ، هو حبه ولهذا سمّوه بالورد في المثل فلازم يتحمّل منه كل أمر غير محبوب وهذا اللي شبهه المثل بشكوك الورد .
وهذا المثل مش بالضرورة ينطبق على الاشخاص لاكن يمكن أن ينطبق على الأملاك اللي يمتلكها الشخص أو الوظيفة اللي يتقلّدها لازم زي ما يبيها يتحمل زلاّتها .

طارق المصراتي
17-07-2008, 11:56 AM
عنوان المثل:

الجمل ما يشبحش لـ عوج رقبته !!!

المعنى من المثل والمناسبة اللي تنقال فيه:

هذا المثل ينقال للشخص اللي ديما يتهزّا على الناس ويسخر منهم ، لكن المصيبة مش هكي وبس المصيبة إنه كل اللي يتهزّا عليه يدير فيه ، يعني كأن السيئة اللي يدير فيها هو ما ينظرلهاش أبداً وتعتبر عنده كأن لم يكن .
فعلاً الجمل بطبيعتة وتركيبة جسمه ما يقدرش ينظر لقوس رقبته الطويلة ؛؛ والله فـ محلها جت ...

ماجد
17-07-2008, 01:09 PM
والله كلامك صح يا طارق في اشكال هلبة زيهم ربي يهديهم

شارلك هولمز
17-07-2008, 01:46 PM
- لو تطلع الشمس في الليل ما يطلعوا من مخانب." بيقولك أن قديش الليل ستار"
- اللي مايستحي من ركوبك ما تستحي من التنكيس بيه." بيقولك أن اللي يحاول يستغلك ما ترحماش"
- الملح فارس يلحق." بيقولك أ، الملح لو نقص يزيدوه ، لكن كان زاد معاش تقدر تنقصه"
- اللي تديره العمشة ياكلو ضراريها." بيقولك أن اللي كل حد عنده من يتحمله ، أو كل حد يتحمل مسؤولية نفسه"
- شكارة العروس أمها وخالتها. " بيقولك أن اللي بيمدحوك عندهم فيك مصلحة ، وما حد بيشهد على أهله بالحق"

مريم
17-07-2008, 09:30 PM
كلام الليل مدهون بالزبدة تزرق عليه الشمس يسيح ،،،

و بصراحة في وجهة نظري ، ان المثل هذا ينطبق على اقوال الرجال ،، و معناه واضح ،،
طبعا مش الكل لكن الاغلبية العظمى ،، و يقصد به ان في بعض الناس كلامهم حكي بس ،
و لكن بعتالي ما يصير شي و كأن ما دووش ، و التشبيه حلو يعني و كأنه كلامهم داهنينه بالزبدة
واول ما تطلع الشمس يسيح يعني ما يصير شي !!

ليبي وأفتخر
18-07-2008, 03:30 AM
السلام عليكم
يقول المثل
)ثور رباتا مرا طلع ما يحرت(

وهذا المثل شارح روحه

2‏ صاحب العله ينخصنا مرافقا
وهدا ينقال للي يبدا داير حاجه ومش عارفها حد ويبدا مرتبك

سارة العرادى
18-07-2008, 12:44 PM
اعجبنى جدا الفكرة التى تم بها طرح الامثال الشعبية، مشاركة متميزة منك اخى طارق المصراتى،

انى من محبى الامثال الشعبية الليبية،كلها حكم، و تتماشى مع الواقع،

حنشارك بهذا المثل:

بات ليلة فى الدباغ صبح قربه

مش متاكدة من كلمة الدباغ، بس المثل ينقال فى الشخص اللى بسرعة ما يتطبع بطبع غيره، ولو غلط الكلمة صححوها

ومشكورين.

مريم
18-07-2008, 03:20 PM
صح يا سارة الدباغ ، و هو مدبغة الجلود ، اللي تجعل من الجلد العادي قربة للماء !

أما مثلي أنا يقول ::

الليلة السعيدة تبان من مغربها (( من رثاء علي الكيلاني في أمه الله يرحمها ))

يعني ان ( الربيع من فم الدار يبان )

و بمعنى أيضا (( يبان الجواب من عنوانه ))

و فعلا يا ناس الليلة السعيدة تبان من مغربها ، و الله كل شي واضح من بداياته
يعطي دلالة على ماهيته ،،،،

تحياتي

سارة العرادى
18-07-2008, 05:43 PM
شكرا اختى مريم "ميمو"، فعلا حلوة الامثال الليبية وعندى مزيد فى جعبتى:

اللى فات مات
-تنقال للشخص اللى مش قادر ينسى خصامه ،مثلا: خلاص ياخى توا اللى فات مات.
كل بلاد وعزاها
-تنقال فى اختلاف عادات وتقاليد البشر من بلد لاخر حتى انهم فى الشىء اللى ايجى فجاة ليهم رودود فعل مختلفة
غاب القط العب يا فار
-هذا المثل مستخدم هلبة فى ليبيا، عندى عليه تعقيب: هل هو فعلا ليبى الاصل؟ منعرفش علاش انحس فيه جاينا من مصر وينقال لما يغيب المسوول عن تابعيه...زى مثلا الوالدين عن الابناء،الاستاذ عن الطلبة،المدير عن الموظف
فتش عالجار قبل الدار
-هذا المثل ينقال لتوضيح ضرورة الجار الحسن الخلق،
ارحم من زار وخفف
-هذا المثل ينقال حتى متصبحش الناس ثقل على بعضها،
حصانه جراى
-تنقال فى الشخص اللى يحضر لمادبة الغداء ، او يكون موجود لحضة وجود خيرات بحيث يكتب له نصيب فيها.

معليشى نبى نسأل: هل فى كتب أمثال شعبية تباع فى المكتبات؟ واذا كان فى وين ممكن نلقاها وشنو اسم الكتاب؟ منبيش موقع على النت انفضل كتاب، لو فى حد يعرف و مشكورين

ودمتم فى رعاية الله

مريم
18-07-2008, 07:55 PM
و الله يا سرو ما اعتقدش ان في كتب ليبية بها امثال ليبية
أحسن شي ، تاخدي مذكرة حلوة بألوان جميلة و تكتبي فيها حضرتك
كل مثل تناولناه في هذا الموضوع ، و ترتبي الامثال بطريقة معينة مثلا حسب الابجدية !
و يكون اصدار خاص بيك من تنسيقك و تحسينك ،، تحياتي ليك

و المثل امتعي يقول :

اللي ينعزم في نهاره ، أحسنله يقعد فداره

بمعنى اللي يعزمك في نفس اليوم ، ما خاطراش انك تجيه ، يعني عزومته شبه كذابية ،،،،




أخي طارق ، وين مشاركاتك مستنيينك

شارلك هولمز
18-07-2008, 09:13 PM
قالت مريم أن هذا المثل ينطبق على أغلب الرجال ، على اعتبار أن كلامها صحيح أن بنقوللها يامريم : أن المشكلة هي أن النساوين معاش يعرفن الزبدة ،لأنهن قطعن العلاقة العاطفية التاريخية بينهن وبين المطبخ، ولذلك يفوت عليهن الكلام هذا .

تقبلي هذا الرد يامريم وردي عليه.


وإليكم هذا المثل ، اللي مرات ينطبق عليا أنا في ردي على مريم :
"صاحب العله ينخصنه مرافقه"

مريم
18-07-2008, 09:34 PM
و الله زي ما قلت أخي الكريم شارلوك هومز ، صح اغلب نساء اليوم انقطعت علاقتهم
العاطفية بالمطبخ ، ولكن ولت ليهم علاقات غرامية ب ( الكوك دوور ، و مؤمن ، و بيتزا هاوس ،،، )

لكن اني ، نحب الزبدة ما ناكلش الا بيها ، و نموت في الطبخ ، يعني فناااااااااانة في الطبخ

و نفسي فيه اتهبل ،، بكل غرور ما شاء الله عليا ، فالحة ، بنت ماما ،،،،

و المثل حلو ، لكن سبق و ان ادرجوه ،،،، لو تشوف صفحات الموضوع تلقاه ،،،،

و هذا المثل امتعي

صرتي يا كرمة و صار فيك التين !!

يعني يقال لما حد كان حضيض و فجأة صار و شاف روحه عالناس

سارة العرادى
19-07-2008, 09:04 AM
ولت حليمة لعادتها القديمة

تنقال لما الشخص يوقف عن فعل شىء لفترة ثم يعود اليه....

فالطبع يغلب التطبع;)

اميرة
19-07-2008, 10:20 AM
بالصراحة هدا الموضوع جميل وقيم واني انحب الثرات وأمثال
لكن اكثر مثل أعجبني دوام الحال من المحال وهدا مثل واقعي بحث
وايضا مثل الاخ الديب جميل والطريقة السرد جد ممتازة وبالتوفيق :)

طارق المصراتي
23-07-2008, 07:13 AM
عنوان المثل:

اللي بدلك بالفول ؛؛؛ بدله بقشوره !!!

المعنى من المثل والمناسبة اللي تنقال فيه:

هذا المثل ينقال للشخص اللي يكون قريب ليك ، لكن من غير سبب ينقلب عليك ويحادي شخص ثاني ما يستاهلش يكون رفيق ، وأكثر شئ تكون الصحبة من أجل مصلحة .
والمثل هذا دارلكم حل لهذا الشخص ، وزي ما دارلك ديرله ، يعني بدله وفضل عليه حتى شخص أزفت منه باش يعرف مقدار نفسه .

اميرة
23-07-2008, 11:21 AM
(ما طاب اللحم لين ربي رحم )
معنى هذا المثل :
اى ان الانسان لا ييأس من رحمة الله اى بما معناها :
ما بين غمضة عينا وانفتحاتها يغير الله من حال من حال المثل الآخر: ]
(الا ما يجي مع العروس ما يجي مع أمها )
معنى هذا المثل:
اي الا ما يجي من البداية مش ضروري منه بعدين اي مثل قلته

طارق المصراتي
23-07-2008, 11:47 AM
عنوان المثل:

1/ اللي ادّيره في الرخيص ؛؛؛ تلقاه في الغالي !!!

2/ ياداير ؛؛؛ يا لاقي !!!

المعنى من المثل والمناسبة اللي تنقال فيه:

حبيت نمزج المثلين مع بعضهم لأن معناهم واحد ، وإنتم ليكم الخيرة في المثل اللي تبّوا تستعملوه في حياتكم .

ينقال في الشخص اللي ما يرحمش الناس ، يعني ما عنداش مشكله إنه يدير العبيتر فيهم من غير ضمير ، زي الشباب اللي يضحكوا علي بناويت الناس ، بعدين يجي يوم ويبدا يشبح في اللي كان يدير فيه يندار للغالي عليه طبعاً بناته وصغاره .

مريم
23-07-2008, 09:49 PM
افتك جحي من قولة حي


يعني لما حد يفتك من حاجة كانت شاغلاته او مسببتله بعض المتاعب
و فجأة يفتك منها ، فيقال المثل السابق

طارق المصراتي
27-07-2008, 07:56 AM
عنوان المثل:

ما لحقش العنقود ؛؛؛ قال حامض !!!

المعنى من المثل والمناسبة اللي تنقال فيه:

معنى المثل إن الشخص لما يوقف تحت دالية عنب ويعجبه عنقود من عناقيدها يعني زهي فـ عينه لكن من علو الدالية ما شاء الله صعب عليه إنه يوصل للعنقود اللي في باله ، ويبدا يتسبل للشخص اللي موجود جنبه بأن العنقود حامض وما زال ما طابش .
وهذا حال الشخص الحسود لمّا يشوف غيره زاد عليه خير من ربي مثلاً سيارة أو حوش ........الخ ، وهذا الحسود ما يقدرش يدير زيه ويملك كل هالأمور فيبدا يدم في حاجة صاحبه مثلاً السيارة يقوله طبل وطروفها ما فيش وينزله فيها الدمير .

طارق المصراتي
28-07-2008, 09:45 AM
عنوان المثل:

يا كليمتي ولّيلي أو يا كلمتي ولّيلي !!!

المعنى من المثل والمناسبة اللي تنقال فيه:

لمّا الشخص يقول كلمة في موضوع معين مطروح مع شخص آخر أو مجموعة أشخاص ، ويبدي رأيه فيه ، لكن رأيه هذا ما عجبش الشخص الثاني أو رأيه خاطئ ، ويرد عليه الشخص الثاني بلهجة شديدة أو باستهزاء وما يُطلقاش لين يقتنع ، في الحالة هادي ينقال المثل يا كليمتي ولّيلي ، وفيه دلالة على إن الشخص ندم على الكلمة اللي قالها وتمنى إنها ما صدرتش منه ...

طارق المصراتي
29-07-2008, 09:14 AM
عنوان المثل:

الفم في المخلة ؛؛؛ والعين في النادر !!!

المعنى من المثل والمناسبة اللي تنقال فيه:

هذا المثل نوضحوا معناه : المخلة هي عبارة عن إناء مصنوع من السعف (ورق النخل اليابس) يوضع فيه الشعير ، والنادر هو الشعير الغير مدروس يعني قاعد بسبوله .
معنى المثل لمّا الحمار أو الحصان أكرمكم الله يحطوله الشعير في المخلة يبدا ياكل لكن نظره متجه لكومة الشعير اللي خدوله منها في المخله ، فمه في المخلة ياكل منها لكن نظره متجه لكومة الشعير .
هذا المثل ينقال للشخص الطماع اللي يرغب في رزق الدنيا رغم إنه عاطيه ربي لكن عينه ديما واسعة وما زال يبي يجمع رزق الدنيا ؛؛؛ إن شاء الله يقعد بعده .

استادة
30-07-2008, 08:24 PM
حوش النهاش مايعلاش معناه انه السارق والخناب عمره لا يعله ولاعمره يدير فلوس

استادة
02-08-2008, 01:10 PM
عريان وفى ايده خاتم معناه على الانسان يلى يدور على الكماليات ويجرى وراءها وينسى الاساسيات وضرورتها

طارق المصراتي
06-08-2008, 10:23 AM
عنوان المثل:

اللي يودّك بالعيش ؛؛؛ وده بـ ايكاله !!!

المعنى من المثل والمناسبة اللي تنقال فيه:

ينقال لما الضيف يجيك ويجيب معاه شي من الأكل مثلاً : تمر ، حليب ، كعك أي حاجة ، فلازم إنك تحطله من الشي اللي جابه إكراماً ليه وبإن الشي اللي جابه قيم .

طارق المصراتي
07-08-2008, 01:20 PM
عنوان المثل:

ما تكحل العمشة ؛؛؛ لين العرس يفض !!!

المعنى من المثل والمناسبة اللي تنقال فيه:

ينقال للشخص اللي باله واسع فوق اللزوم ، ووسعة باله هادي تضيع عليه في أمور كثيرة ، وهذا حال المرا لما بتمشي للعرس تبدا تتمكيج علي مهلها والناس تراجي فيها باش تمشي معاهم لين العرس يفوت باش توتي روحها .

DAMAGE
08-08-2008, 12:49 AM
اللي ايديرا بيدا ربي ايزيدا


تنقال في اللي ادير غلط وولي عليه او اطيح على راسه

طارق المصراتي
10-08-2008, 07:53 AM
عنوان المثل:

مولا الحوش علي مهله ؛؛؛ والزوالي عقله طار

المعنى من المثل والمناسبة اللي تنقال فيه:

معناه إن الشخص اللي يساسي يعني يطلب أو يوهب وهذا هو الزوالي في المثل يبدا يستنى قدام باب الحوش على عصابه ويستنى في مولا الحوش أمتا يجيبله هاديكا الحاجة ، لكن مولى الحوش ما يندريش عالنار اللي قاعد فيها الساساي ويبدا على مهله يدورله في الحاجة .

وهذا المثل ينقال للشخص المستعجل وواقفه مصلحته على شخص ثاني باله واسع وعنده اللامبالاة .

طالب القانون
14-08-2008, 01:45 AM
السلام عليكم

بصراحة الموضوع اعجبني اشكر اخوي طارق المصراتي علي الطرح القيم

والحمد الله ان مزال في شباب من الجيل الجديد يتابعو في الاشياء التراتية والشعبية وعوايد اهلنا و
موضوع في قمة الروعة
الف شكر الي صاحب الموضوع والي كل الي شارك فيه

حبيت انزيد حاجة علي متل قاله خوي طارق المصراتي

اللي يودّك بالعيش ؛؛؛ وده بـ ايكاله !!!
اللي يودّك بالعيش؛؛؛ وده ب ايدامه .......الايدام هو(( الطبيخة الي يضع علي العيش او البازين )


وعندي مشاركة بمتال طالما احببته و ردته


( من قبل يازول مبهاه يابال سلو عموده ))

يقصد بهدا المتل ان الانسان ايعاند ولما ايجيه حد تاني ايكون معاه في نفس الراي فهدا الشخص بيزيد في العناد يعني بيكون الشخص الاول مسبل ماصدق ))


وان شاء الله اوفيكم بكل ماهو جديد في داكرتي

اسير الصحراء
14-08-2008, 05:53 AM
عصفور بليد ولاعشره عالشجره

معشوقة الجماهير
16-08-2008, 07:32 PM
صح لسانك ويسلم عقلك علي هالامتال السمحة وعندي ليكم مثل
الوسادة تغلب الودادة
والمعني من الوسادة هي الزوجة والودادة هي الام والمقصود بيه ان مهما الام تكزن صعبة او تحب ولدها يقعد تحت جناحها فالزوجة ليها مكنها عند الزوج

ليبي وأفتخر
16-08-2008, 09:29 PM
كل قربه اتصب فوق راس صاحبها

ليبي وأفتخر
16-08-2008, 09:29 PM
كان ما نعرفك يا جارتي راني قلت عليك عطاره

طالب القانون
16-08-2008, 10:02 PM
ياهارب من الغولة ياطايح في سلال القلوب

يوسف الفاخرى
17-08-2008, 01:52 AM
هلى عندا دوس اقحقحلى


هدا المثل يقال عند المصلحة

تحياتى

طارق المصراتي
19-08-2008, 10:38 AM
عنوان المثل:

يا صحيحتي عزيني ؛؛؛ من غير صحتي ما لقيت من يبيني

المعنى من المثل والمناسبة اللي تنقال فيه:


هذا المثل يدل على إن الصحة تاج فوق الرؤوس ولا يمكن للإنسان أن يبدل صحته لا برزق دنيا ولا بصديق ولا غيره ، ومن غير الصحة الناس تنفر من الشخص يعنى مكانته عندهم مش زي الشخص الصحيح هكي الواقع الله غالب .